اسلام آباد (نیوز ڈیسک)عالمی منڈی میں تیل کی قیمتوں میں بڑی کمی، مگر حکومت کا پٹرولیم مصنوعات سستی نہ کرنے کا فیصلہعوام کو ایک مرتبہ پھر مہنگائی کے بوجھ تلے دبائے رکھنے کا فیصلہ کرتے ہوئے حکومت نے عالمی سطح پر تیل کی قیمتوں میں تاریخی کمی کے باوجود پٹرولیم مصنوعات کی قیمتیں برقرار رکھنے کا اعلان کیا ہے۔
ذرائع کے مطابق حکومت اس بچت کو عوامی ریلیف کے بجائے ترقیاتی منصوبوں، خصوصاً شاہراہوں کی تعمیر و مرمت پر خرچ کرنے کا ارادہ رکھتی ہے۔وزیر اعظم نے چند روز قبل ایک تقریب میں عوام کو خوشخبری دینے کا اشارہ دیا تھا کہ پٹرول کی قیمتوں میں کمی ممکن ہے۔ تاہم، اس بیان کے کچھ ہی دن بعد وفاقی کابینہ کے اجلاس میں بالکل برعکس فیصلہ سامنے آیا، جس میں قیمتوں کو کم نہ کرنے پر اتفاق کیا گیا۔میڈیا رپورٹس کے مطابق تیل کی بین الاقوامی قیمتیں گزشتہ پانچ برسوں کی کم ترین سطح پر آ چکی ہیں۔ اس کے باوجود حکومت نے وہ فائدہ عوام کو منتقل کرنے کے بجائے اس رقم کو ترقیاتی کاموں، خاص طور پر سڑکوں اور انفراسٹرکچر کی بہتری پر لگانے کا عندیہ دیا ہے۔
یاد رہے کہ کچھ دن قبل یہ پیش گوئیاں کی جا رہی تھیں کہ 16 اپریل سے پاکستان میں پٹرول کی قیمت میں 8 سے 12 روپے فی لیٹر تک کمی ممکن ہے، مگر اب سرکاری سطح پر واضح کر دیا گیا ہے کہ عوام کو پٹرولیم مصنوعات کی مد میں کسی بھی قسم کا ریلیف فراہم نہیں کیا جائے گا۔
