اسلام آباد (نیوز ڈیسک) عالمی بینک نے پاکستان کی معیشت میں بہتری کا اعتراف کرتے ہوئے 20 ارب ڈالر کے ترقیاتی قرضوں پر مبنی کنٹری پارٹنرشپ فریم ورک (سی پی ایف) کے تحت 10 سالہ شراکت داری کا اعلان کر دیا ہے۔نجی ٹی وی کی رپورٹ کے مطابق عالمی بینک کے کنٹری ڈائریکٹر، ناجی بن ہیسن، نے سوشل میڈیا پر جاری اپنے بیان میں کہا کہ پاکستان میں اقتصادی استحکام مضبوط ہو رہا ہے، جس کی بنیاد پر عالمی بینک گروپ نے پاکستان کے ساتھ تعاون کو مزید فروغ دینے کا فیصلہ کیا ہے۔
انہوں نے واضح کیا کہ یہ پارٹنرشپ فریم ورک 2026 سے نافذ العمل ہوگا اور ملکی ترقی کے حوالے سے ایک اہم پیش رفت ثابت ہوگا۔ ان کے مطابق اس منصوبے کے تحت فراہم کیے جانے والے 20 ارب ڈالر کو صاف توانائی، ماحولیاتی تحفظ اور دیگر ترقیاتی اقدامات میں بروئے کار لایا جائے گا۔عالمی بینک کا کہنا ہے کہ یہ شراکت داری نہ صرف پاکستان میں طویل المدتی ترقیاتی منصوبوں کو تقویت دے گی بلکہ معیشت کو استحکام فراہم کرتے ہوئے نئی امیدوں کو بھی جنم دے گی۔
