لاہور( این این آئی)پاکستان کے خراب معاشی حالات کے پیش نظر ایک سال کے دوران پاکستان سے 6 لاکھ سے زائد اعلی تعلیم یافتہ اور قابل نوجوان اچھے مستقبل کیلئے بیرون ممالک منتقل ہوچکے ہیں۔رپورٹ میں بتایا گیا ہے کہ اعلی تعلیم یافتہ نوجوانوں کی جانب سے بہتر زندگی کی تلاش میں ملک چھوڑ کر جانے کی شرح میں غیر معمولی اضافہ ہوگیا ہے۔

رپورٹ کے مطابق پاکستان کی خراب معاشی حالت سے تنگ 6 لاکھ سے زائد نوجوان اپنے اچھے مستقبل اور بہتر زندگی کی تلاش کیلئے بیرون ممالک منتقل ہوچکے ہیں۔رپورٹ میں بتایا گیا ہے کہ پاکستان سے باہر جانے والے نوجوانوں میں 6 ہزار 351 انجینئرز، 2 ہزار 580 ڈاکٹرز اور 1194 اساتذہ سمیت دیگر ماہرین شامل ہیں۔تارکین وطن کی روانگی میں سہولت فراہم کرنے والے ٹریول ایجنٹس کا کہنا ہے کہ ملک چھوڑ کر جانے والے افراد کی اصل تعداد رپورٹ ہونے والے اعداد و شمار سے کہیں زیادہ ہوسکتی ہے۔