اسلام آباد(این این آئی)وفاقی وزیرداخلہ رانا ثناء اللہ نے کہا ہے کہ پاکستان تحریک انصاف کے چیئرمین عمران خان کے خلاف9مئی کو پیش آنے والے واقعات کی منصوبہ بندی اور عمل درآمد پر کارروائی فوجی عدالت میں ہوگی، اس سارے فساد کا تخلیق کار وہ خود ہے،اگر وہ ملزم نہیں ہے تو اور کون ہے

اس کے ثبوت موجود ہیں۔نجی ٹی وی سے گفتگو کرتے ہوئے وزیرداخلہ نے کہاکہ رانا ثناء اللہ نے عمران خان پر الزام عائد کیا کہ انہوں اپنی گرفتاری سے قبل ہی ذاتی طور پر فوجی تنصیبات پر حملے کی منصوبہ بندی کی تھی۔انہوں نے کہا کہ ان دعووں کو ثابت کرنے کے لیے ثبوت بھی موجود ہیں۔ایک سوال پر وزیرداخلہ نے کہا کہ مجھے سمجھ نہیں آرہی ہے کہ یہ دلیل کیسے بنتی ہے کہ وہ جیل میں تھا جبکہ سارا کچھ کرنے والا وہ تھا۔انہوں نے کہاکہ انہوں نے جو نعرہ لگایا تھا کہ عمران خان ہماری ریڈ لائن ہے، اس کے اوپر انہوں نے جو پیش بندی،منصوبہ بندی اور تیاری تھی وہ ساری عمران خان کے حکم پر تھی اور اس نے یہ سارا کروایا۔رانا ثناء اللہ نے کہا کہ اس سارے فساد کا تخلیق کار وہ خود ہے،اگر وہ ملزم نہیں ہے تو اور کون ہے، اس کے ثبوت موجود ہیں۔انہوںنے کہاکہ یہ دستاویزی شکل میں بھی ہے،ٹوئٹس پر بھی ہے،پیغام دیتے رہے ہیں ہر جگہ سے یہ چیز ملتی ہے، یہ سارا کچھ وہ طے کر گئے تھے کہ کس نے کیا کرنا ہے اور کہاں کرنا ہے، اسٹریٹجی کیا ہوگی، کس کی کس جگہ ڈیوٹی ہوگی، یہ سارا کچھ پہلے سے طے شدہ تھا۔رانا ثناء اللہ سے سوال کیا گیا کہ کیا عمران خان کے خلاف کارروائی فوجی عدالت میں ہوگی تو انہوں نے جواب دیاکہ جی بالکل،کیوں نہیں چلے گا، جو انہوں نے فوجی تنصیبات کو نشانہ بنانے کا پروگرام بنایا اور اس پر عمل کروایا تو یہ میری سمجھ کے مطابق یہ بالکل فوجی عدالت کا کیس ہے۔