لاہور (مانیٹرنگ ڈیسک) پی ٹی آئی رہنما و معروف گلوکار ابرارالحق نے بھی پارٹی اور سیاست چھوڑنے کا اعلان کردیا ہے۔ لاہور پریس کلب میں پریس کانفرنس کے دوران ان کا کہنا تھاکہ میری پرورش ایسے گھرانے میں ہوئی جو سیاسی بھی تھا اور فوجی گھرانہ بھی تھا، اللہ نے جب مجھے شہرت دی تو پاکستان کے لیے کچھ کرنے کا جذبہ تھا۔

ابرارالحق کا کہنا تھا کہ شہدا کے بچوں کے لیے ہمارے میڈیکل کالج میں تعلیم مفت ہے، میری عادت ہے کہ میں شہدا کی تصویر کو سلیوٹ کرتا ہوں، سہارا میں ہم ہر سال شہدا کے خاندانوں کو بلا تے ہیں، مجھے شہرت یا عہدے کی کوئی لالچ نہیں۔انہوں نے جب سیاست سے علیحدہ ہونے کا اعلان کیا تو نظم بھی سنائی جس پر وہ آبدیدہ ہو گئے، ابرار الحق نے کہا کہ جب سیاست ہی چھوڑدی توپھرپی ٹی آئی یا کسی جماعت کا نام کیا لینا؟ توپھرکوئی سیاسی بیان کیا دینا؟