سکھر (این این آئی)سکھر کے علاقے روہڑی کے قریب 2مسافر کوچز میں تصادم کا واقعہ پیش آیا ہے جس میں 2مسافرجاں بحق اور 17سے زائد زخمی ہوگئے، ہلاکتوں میں اضافے کا خدشہ ہے۔سندھ سے پنجاب آنے اور جانے والی دو مسافر کوچز کے

مابین خطرناک حادثہ کے نتیجے میں دو مسافروں نے موقع پر ہی جان دے دی جبکہ17 زخمی ہوگئے، جنہیں طبی امداد کیلئے قریبی اسپتال منتقل کیا گیا۔ متعدد افراد کی حالت نازک بتائی جارہی ہے۔ریسکیو ذرائع نے بتایاکہ زخمیوں کو تعلقہ اسپتال روہڑی منتقل کیا گیا ہے، واقعے میں ہلاکتوں میں مزید اضافے کا خدشہ ظاہر کیا جارہا ہے، مسافر کوچز کراچی سے رحیم یارخان اور بہاولپور سے کراچی آرہی تھیں۔بتایا جاتا ہے کہ حادثہ تیز رفتاری، غفلت اور لاپرواہی کے باعث رونما ہوا۔ ریسکیو ذرائع کے مطابق حادثہ انتہائی شدید نوعیت کا تھا۔ حادثے کی اطلاع ملتے ہی امدادی ٹیمیں اور ایمبولینسز جائے وقوعہ پر پہنچ گئیں جہاں زخمیوں کو ابتدائی طبی امداد دینے کے بعد زخمیوں اور نعشوں کو ہسپتال منتقل کیا گیا۔