لاہور ( این این آئی)مرکزی صدر پاکستان تحریک انصاف چودھری پرویزالٰہی سے سابق صوبائی وزراء چودھری ظہیر الدین، سردار وقاص موکل، چودھری شبیر گجر، چودھری نوید گوندل، چودھری مختار گوندل اور آصف عرفان نے ملاقات کی۔ آزاد کشمیر کے سابق وزیراعظم سردار تنویر الیاس کے بعد اب شہبازشریف کے نااہل ہونے کی باری ہے،
شہبازشریف نے توہین عدالت کے ساتھ ساتھ عدلیہ کی حکم عدولی بھی کی ہے، الیکشن کمیشن سپریم کورٹ میں رپورٹ جمع کروا چکا ہے کہ عدالتی حکم کے باوجود حکومت نے الیکشن کیلئے فنڈز فراہم نہیں کیے، یہ رپورٹ حکومت کے خلاف ارتکاب جرم کا دستاویزی ثبوت ہے اس کے بعد اب کسی ثبوت کی ضرورت نہیں رہی، نگران حکومت کے خلاف بھی الیکشن کمیشن رپورٹ جمع ہو چکی ہے اور محسن نقوی مطلوبہ الیکشن سکیورٹی فراہم نہ کر نے پر جیل بھی جا سکتے ہیں، توہین عدالت کے مجرم کسی معافی کے مستحق نہیں، یہ نااہل حکمران معاشرے کو انارکی کی طرف دھکیلنا چاہتے ہیں جس کی عدلیہ کبھی اجازت نہیں دے گی۔ انہوں نے کہا کہ اسحاق ڈار پاکستان کو ڈیفالٹ کرانے کے مشن پر آئے ہیں، نوازشریف نے اسحاق ڈار کو اپنا ملک دشمن ایجنڈا دے کر پاکستان بھیجا ہوا ہے، آئی ایم ایف سے جلد معاہدہ ہو جانے کے اسحاق ڈار کے دعوے ہوا میں تحلیل ہو چکے ہیں، ان نااہلوں کی حکومت میں معیشت کی بحالی کا دور دور تک کوئی امکان نظر نہیں آ رہا۔ چودھری پرویزالٰہی نے کہا کہ غریب آٹے کیلئے اور مریض دوائیوں کیلئے مر رہے ہیں، مارکیٹ سے جان بچانے والی دوائیاں تیزی سے ختم ہو رہی ہیں، اسحاق ڈار کی احمقانہ معاشی پالیسیوں سے تنگ آ کر دواساز کمپنیاں اپنے کاروبار بند کر رہی ہیں، حالات اتنے خراب ہو چکے ہیں کہ عالمی ادارے بھی پاکستان میں جان بچانے والی دوائیوں کی کمی پر مسلسل تشویش کا اظہار کر رہے ہیں اور پاکستان کو مریضوں کیلئے انتہائی خطرناک ملک قرار دیا جا رہا ہے، عالمی اداروں کو بھی نظر آ رہا ہے کہ موجودہ حکومت کے ہوتے ہوئے ملکی معیشت سنبھلنے کا کوئی امکان نہیں۔
