آگرہ(این این آئی) جائیداد کے کاغذات پر مردہ خاتون کا انگوٹھا لگوانے کی ویڈیو سوشل میڈیا پر وائرل ہوگئی۔میڈیارپورٹس کے مطابق سوشل میڈیا پر وائرل ویڈیو میں دیکھا جا سکتا ہے کہ ایک شخص گاڑی کی پچھلی سیٹ پر موجود مردہ خاتون کا انگوٹھا مختلف کاغذات پر لگوا رہا ہے۔ یہ انسانیت سوز واقعہ بھارت کے شہر آگرہ میں پیش آیا۔پولیس کے مطابق کملا دیوی کے شوہر کا کچھ عرصے پہلے انتقال ہوگیا تھا اور ان کی کوئی اولاد نہیں تھی۔ کملا دیوی کے بہنوئی کے بیٹوں نے جائیداد کے جعلی کاغذات بنوائے تھے۔ کملا دیوی کی بھانجی کے بیٹے کی شکایت پر پولیس نے مقدمہ درج کرلیا ہے جس کا کہنا ہے کہ ملزمان لاش کو اسپتال لے جانے کا کہہ کر لے گئے تھے اور راستے میں گاڑی روک کر یہ کارروائی کی۔