اسلام آباد (مانیٹرنگ ڈیسک )راجن پورکےکچے کے علاقے میں ڈاکوؤں کے خلاف آپریشن میں مصروف پولیس اہلکاروں کی سانپ پکڑ کر باربی کیو پارٹی کرنےکی ویڈیو وائرل ہوگئی۔ویڈیو میں دیکھا جاسکتا ہے کہ پولیس اہلکار سانپ کی کھال اتار کر

اس کو مصالحہ لگا رہے ہیں اور لیموں چھڑک رہے ہیں۔ پولیس اہلکار کا کہنا تھا کہ ہم ملک دشمنوں کو بھی اسی طرح لیموں چھڑک کر کھاجائیں گے۔جیو نیوز کے مطابق ایک پولیس اہلکار کا کہنا تھا کہ یہ ہم نے پاک فوج کے اسپیشل سروس گروپ (ایس ایس جی) کی زیرکمانڈ ہونے والے انسداد دہشت گردی کے کورس میں سیکھا ہے، وہاں سروائیول ایونٹ میں ہمیں زندہ رہنے اور پروٹین حاصل کرنے کے لیے ایسی چیزیں کھانے کے لیے ہمیں تربیت دی گئی تھی۔ویڈیو میں پولیس اہلکاروں کو سانپ کو کوئلے پر پکانے کے بعد چٹخارے لے کر کھاتے بھی دیکھا جاسکتا ہے۔پولیس اہلکار کاکہنا تھا کہ کوبرا سانپ میں وافر مقدار میں پروٹین ہوتی ہے،ذائقہ مچھلی اور مرغی جیسا ہے۔خیال رہےکہ سندھ اور پنجاب کےکچےکے علاقے میں دونوں صوبوں کی پولیس کی جانب سے ڈاکوؤں کے خلاف آپریشن جاری ہے۔