واشنگٹن (این این آئی)امریکا میں مشہور ٹیکنالوجی کمپنی ایپل کے ایک اسٹور میں چوروں نے پیشہ وارانہ انداز میں گھس کر چوری کی واردات کی اور تقریبا پانچ لاکھ ڈالر مالیت کے موبائل فون اور پرزہ جات لوٹ لیے۔غیرملکی خبررساں ادارے کے مطابق

چور حیران کن طور پر ایک قریبی باتھ روم کی دیوار کو سوراخ کرکے مشہور کمپنی کے اسٹور میں داخل ہوئے اور اپنا کوئی نشان چھوڑے بغیر ایک بڑی چوری کی واردات کی۔ یہ واقعہ امریکی شہر سیاٹل میں پیش آیا۔واشنگٹن ریاست میں لن ووڈ پولیس ڈیپارٹمنٹ نے اعلان کیا کہ چوروں نے ایلڈر ووڈ مال میں ایپل اسٹور سے 400 سے زیادہ ڈیوائسز چرا لیں، جن کی کل مالیت تقریبا پانچ لاکھ ڈالر ہے۔لین ووڈ پولیس ڈیپارٹمنٹ کی کمیونیکیشن ڈائریکٹر مارین میکے نے ایک بیان میں کہا کہ تقریبا 436 ایپل ڈیوائسز چوری کی گئیں جن کی مجموعی قیمت 500,000 ڈالر تھی۔ ان میں آئی فونز، آئی پیڈز اور ایپل گھڑیاں شامل ہیں۔