اسلام آباد (این این آئی)سابق اسپیکر قومی اسمبلی اسد قیصر نے حکومت کو بحران سے نکلنے کیلئے اسمبلی توڑنے کی تجویز دے دی۔ایک انٹرویومیں اسد قیصر نے کہا کہ ہم مذاکرات کیلئے تیار ہیں، ماحول حکومت نے بنانا ہے۔انہوں نے کہا کہ حکومت سنجیدہ ہے اور بحران سے نکلنا چاہتی ہے تو قومی اسمبلی کو توڑنا پڑے گا۔سابق اسپیکر قومی اسمبلی نے کہا کہ حکومت حالات کنٹرول کرنے کے بجائے بحرانوں میں اضافہ کر رہی ہے، اگر حکومت ایک ہی دن الیکشن کرانا چاہتی ہے تو اسمبلیاں توڑ دے۔انہوں نے کہاکہ اسمبلیاں ختم کر دیں تو آئینی اصلاحات پر بات ہو سکتی ہے۔اسد قیصر نے کہا کہ شہباز شریف فراغت کے ڈر سے الیکشن نہیں کرا رہا، مریم نواز کا رویہ ایک لیڈر کا نہیں ہوسکتا۔انہوں نے کہا کہ پیپلز پارٹی1973ء کے آئین کی خالق ہے لیکن اسی آئین کو توڑ بھی رہی ہے، پوچھتا ہوں پی پی آئین جوڑنے والی ہے یا توڑنے والی؟ اس نے آئین توڑا تو یہ بھٹو کی روح سے غداری ہوگی۔