نیویارک (این این آئی )سوشل میڈیا سائٹ ٹوئٹر پر صارفین کے اکائونٹس سے بلیو ٹِک ہٹانے کا سلسلہ جاری ہے اور اسی سلسلے میں اب ٹوئٹر ویریفائیڈ کے نام سے بنے اکائونٹ نے تمام اکائونٹس کو ان فالو کردیا ہے۔غیرملکی میڈیا کے مطابق Twitter Verified اکائونٹ پر فالوونگ اب زیرو پر پہنچ گئی ہے جو کہ اس سے قبل تقریبا 420،000 تصدیق شدہ اکانٹس کو فالو کیے ہوئے تھا۔ بلیو سبسکرپشن کے لیے ادائیگی نہ کرنے والے اکانٹس کو ٹوئٹر کی جانب سے یکم اپریل سے بلیو ٹِک ہٹانے کا انتباہ کیا گیا تھا۔ ٹوئٹر پر سب سے پہلے 2009 میں تصدیق شدہ اکائونٹس کے لیے بلیو ٹِک متعارف کرایا گیا تھا تاکہ صارفین کو مشہور شخصیات، سیاستدان، کمپنیاں، برانڈز، خبر رساں اداروں اور عوامی مفاد کے اصل اکانٹس کو پہچاننے میں مدد ملے۔