پشاور(این این آئی) خیبرپختونخوا کی 12 جامعات بغیر وائس چانسلر کے چلنے کا انکشاف ہوا ہے، صوبے کی 5 جامعات میں تو وائس چانسلر کے بغیر ہی چل رہے ہیں ۔فپواسا نے وائس چانسلرز کے حوالے سے گورنر خیبرپختونخوا اور نگران وزیر اعلیٰ کو خط لکھنے کا فیصلہ کرلیا۔

ذرائع کے مطابق وومن یونیورسٹی صوابی، خوشحال خان یونیورسٹی بغیر وی سی اور پرو وی سی چل رہے ہیں جبکہ لکی مروت یونیورسٹی، انجینئرنگ یونیورسٹی نوشہرہ میں بھی پرو وائس چانسلر اور وائس چانسلرزنہیں جس کے باعث جامعات مشکلات کا شکار ہیں ۔ ذرائع کے مطابق جامعات میں تنخواہیں دینے اور یوٹیلیٹی بلز پاس کرنے کے لئے دستخط کے لئے کوئی اتھارٹی نہیں۔ جبکہ گاڑیوں کے بلز سمیت دیگر مالی اور دفتری امور بری طرح متاثرہورہے ہیں ۔ قپواسا کے صوبائی صدر ڈاکٹر فیروز شاہ نے جامعات کے وائس چانسلرز کے حوالے سے گورنر اور نگران وزیر اعلی کو خط لکھنے کا فیصلہ کرلیا ۔ قانون کے مطابق وی سی نہ ہو تو پرو وائس چانسلر انتظامات سنبھالتے ہیں ۔ یہاں 5 جامعات کے پرو وائس چانسلر ہی نہیں ہیں ۔ انتخابات کی وجہ سے وائس چانسلر کی تعیناتی میں مزید تاخیر ہوسکتی ہے۔