ایڈیلیڈ(آن لائن) آسٹریلیا نے دوسرے ٹیسٹ میچ میں پاکستان کو اننگز اور 48 رنز کی شکست سے دوچار کر کے سیریز 0۔2 سے کلین سویپ کر دی ہے۔قومی ٹیم کو برسبین میں کھیلے گئے پہلے ٹیسٹ میچ میں بھی اننگز اور پانچ رنز کی شکست کا سامنا کرنا پڑاجس پر کرکٹ شائقین انتہائی افسردہ ہیں تاہم اوپننگ بلے باز امام الحق کی میچ ہارنے کے بعد گراؤنڈ میں ایسی حرکت کرتے ہوئے ویڈیو اور تصویر وائرل ہو گئی ہے جس نے پاکستانیوں کو افسوس کیساتھ ساتھ غصے میں بھی مبتلا کر دیا ہے۔سوشل میڈیا پر وائرل ہونے والی ویڈیو میں
دیکھا جا سکتا ہے کہ امام الحق آسٹریلین کرکٹ ٹیم کے کوچ جسٹن لینگر کے ساتھ محو گفتگو ہیں اور قہقہے بھی لگا رہے ہیں۔کھیلوں سے وابستہ ایک صحافی نے اپنے ٹویٹر اکاؤنٹ پر یہ تصویر شیئر کرتے ہوئے لکھا کہ ”یہ بڑی شرم کی بات ہے، اتنی بری کارکردگی اور ہار کے باوجود اسی راؤنڈ میں مسکراتے ہوئے شرم آنی چاہئے، کروڑوں پاکستانی اس ہار پر غمزدہ ہیں لیکن بڑی ہمت کی بات ہے کہ آپ خوش ہیں“۔لیجنڈری بلے باز جاوید میانداد کے بھانجے اور سابق ٹیسٹ کرکٹر فیصل اقبال نے تصویر کے کیپشن میں لکھا کہ ”بطور بلے باز ناکام ہونے اور قومی ٹیم کو کلین سویپ شکست کے بعد امام الحق کی یہ تصویر انتہائی شرمناک ہے“۔