اسلام آباد (نیوز ڈ یسک)پاکستان کرکٹ بورڈ (پی سی بی) نے لاہور کے معروف قذافی اسٹیڈیم کے نام میں تبدیلی کے لیے ایک بار پھر عمل شروع کرنے کا فیصلہ کیا ہے۔
میڈیا رپورٹس کے مطابق پی سی بی نے اسٹیڈیم کے نئے نام کے حوالے سے تجاویز طلب کر لی ہیں۔ دلچسپی رکھنے والے افراد اور ادارے اپنی تجاویز 24 مارچ تک پاکستان کرکٹ بورڈ کو جمع کرا سکتے ہیں۔یاد رہے کہ اس سے قبل بھی پی سی بی کی جانب سے اسٹیڈیم کے نام کی تبدیلی کے لیے ٹینڈر جاری کیا گیا تھا، تاہم 2024 میں بورڈ اور ایک نجی بینک کے درمیان ہونے والا معاہدہ حتمی شکل اختیار نہیں کر سکا تھا۔ذرائع کے مطابق مجوزہ معاہدے کے تحت نیمنگ رائٹس کی مد میں پی سی بی کو پانچ سال کے عرصے کے لیے تقریباً ایک ارب روپے حاصل ہونا تھے۔ اب بورڈ نے دوبارہ اس عمل کا آغاز کرتے ہوئے اسٹیک ہولڈرز کو دعوت دی ہے کہ وہ اسٹیڈیم کے نئے نام کے لیے اپنی تجاویز پیش کریں۔
