اسلام آباد (نیوز ڈیسک) ایران اور امریکا کے درمیان جاری جنگ کو 13 دن ہو چکے ہیں اور اس دوران ایرانی حملوں میں امریکی فوج کو ہونے والے جانی نقصان کی تفصیلات سامنے آ گئی ہیں۔

امریکی ذرائع ابلاغ کے مطابق پینٹاگون کے ترجمان شان پارنیل نے بتایا ہے کہ جنگ کے آغاز سے اب تک 8 امریکی فوجی ہلاک جبکہ 140 زخمی ہو چکے ہیں۔انہوں نے وضاحت کی کہ زخمی ہونے والے زیادہ تر اہلکاروں کی حالت تشویشناک نہیں تھی اور ان میں سے 108 فوجی علاج کے بعد دوبارہ اپنی ڈیوٹیوں پر واپس جا چکے ہیں۔پینٹاگون کے ترجمان کے مطابق 8 فوجیوں کو شدید نوعیت کی چوٹیں آئی ہیں اور انہیں خصوصی طبی سہولیات فراہم کی جا رہی ہیں۔ تاہم انہوں نے یہ نہیں بتایا کہ یہ فوجی کن مقامات پر اور کس حملے میں زخمی ہوئے۔

پینٹاگون کے مطابق ایرانی حملوں کے نتیجے میں یکم مارچ کو کویت اور سعودی عرب میں تعینات 7 امریکی فوجی مارے گئے تھے، جبکہ 6 مارچ کو کویت میں ایک اور امریکی فوجی بروقت طبی امداد نہ ملنے کے باعث دم توڑ گیا۔ اس طرح جاری جنگ کے دوران ہلاک ہونے والے امریکی فوجیوں کی مجموعی تعداد 8 ہو گئی ہے۔