لاہور( این این آئی) قومی احتساب بیورو (نیب )نے پاکستان مسلم لیگ (ن) کے مرکزی رہنما خواجہ آصف کے 48 بنک اکائونٹس کا سراغ لگا لیا ہے۔نجی ٹی وی نے ذمہ دار ذرائع کے حوالے سے بتایا ہے کہ سابق لیگی رہنما خواجہ آصف کے خلاف آمدن سے زائد اثاثہ جات اورمنی لانڈرنگ انکوائری میں اہم پیشرفت ہوئی ہے۔
ذرائع کے مطابق خواجہ آصف کے 48 بنک اکائونٹس میں ایک ارب 45 کروڑ روپے کی خطیر رقم جمع ہوئی ہے۔تمام بنک اکائونٹس خواجہ آصف اور ان کے خاندان کے بے نامی اداروں کے نام پر کھلوائے گئے۔ذرائع کے حوالے سے بتایا گیا ہے کہ خواجہ آصف اور ان کے خاندان کے اراکین کے اکائونٹس میں 22 کروڑ 30 لاکھ کی رقوم جمع ہوئیں۔ذرائع کے مطابق گرفتار خواجہ آصف سے دوران تفتیش استفسار کیا جائے گا کہ بھاری رقوم کس مد میں ان کے اکائونٹس میں جمع ہوئیں؟،خواجہ آصف سے بے نامی اداروں کے اکائونٹس میں موجود اور اس کے تعلق کی بابت بھی دریافت کیا جائے گا۔خواجہ آصف کے وکیل چودھری نجم الحسن ایڈووکیٹ کے مطابق خواجہ آصف نے جو کمایا اورپرانکم ٹیکس ادا کیا ہے،خواجہ آصف کا سب کچھ ڈیکلیئرڈ ہے اور ریکارڈ پر بھی موجود ہے۔
