کراچی(این این آئی)سینئر رہنما ڈاکٹر فاروق ستار کی سیاسی تنہائی میں مزید اضافہ ہو گیا ہے،ہم خیال سابق اراکان قومی و صوبائی اسمبلی نے ساتھ دینے سے انکار کر دیا ہے جبکہ فاروق ستار نے کہاہے کہ میں ایم کیو ایم پاکستان کو تباہ ہونے نہیں دوں گا۔فاروق ستارنے پارٹی کی عزت و وقار کی بحالی کے لیے جلد ہی کارکنان کے ساتھ مل کر ایک بڑی تحریک چلانے کا اعلان کردیا ہے۔تفصیلات کے مطابق ایم کیو ایم پاکستان کے سینئر رہنما ڈاکٹر فاروق ستار کی سیاسی تنہائی میں مزید اضافہ ہو گیا ہے۔ ایم کیو ایم رہنما علی رضا
عابدی، ساجد احمد، شیخ صلاح الدین اور جمال احمد نے بھی ان کا ساتھ دینے سے انکار کر دیا ہے جبکہ فاروق ستار کی کامران ٹیسوری سے رابطے کی تمام ترکوششیں بھی نا کام ہو گئی ہیں۔فاروق ستار نے اپنی تنہائی کو چھپانے کی کوشش کرتے ہوئے کراچی میں میڈیا سے بات چیت میں کہا کہ میں تو کسی سے بھی ناراض نہیں ہوں۔ ان کا اصرار تھا کہ یہاں مسئلہ صرف ایم کیو ایم پاکستان کو بچانے کا ہے کیونکہ کچھ لوگوں کی جانب سے جماعت کو غلط ڈگر پر چلایا جا رہا ہے۔انہوں نے کہا کہ مجھے پارٹی کے کسی بھی اجلاس یا مشاورت میں شامل نہیں کیا جا رہا تاہم ایم کیو ایم کے کارکنان ہی انٹرا پارٹی انتخابات میں فیصلہ کریں گے کہ وہ کس کے ساتھ ہیں؟ ان کا سوال تھا کہ اب کیا ہم اتنے گئے گزرے ہیں کہ مجھے منانے کی بات کی جائے گی۔فاروق ستار نے کہا کہ کیا میں یہ کسی کو کہوں گا کہ آپ میری عزت کریں ؟ میں نے فیصل سبزواری سمیت دیگر لوگوں کو انگلی پکڑ کر چلانا سکھایا ہے اور لوگوں کو بتایا کہ الزام بھی لگا اور اپنا احتساب بھی کرو۔ایم کیو ایم رہنما نے پارٹی کی عزت و وقار کی بحالی کے لیے جلد ہی کارکنان کے ساتھ مل کر ایک بڑی تحریک چلانے کا اعلان کر دیا۔