اسلام آباد (نیوز ڈیسک) تیلگو زبان میں بننے والی کامیڈی فلم “رابن ہڈ” جو حال ہی میں سینما گھروں کی زینت بنی ہے، شائقین کی توجہ کا مرکز بنی ہوئی ہے۔ فلم میں مشہور آسٹریلوی کرکٹر ڈیوڈ وارنر نے بھی اپنی اداکاری کا آغاز کیا، جس کے باعث فلم مزید خبروں میں رہی۔
اس فلم کے مرکزی کرداروں میں نیتین اور سریلیلا شامل ہیں، تاہم ڈیوڈ وارنر کی خصوصی شرکت بھی فلم کی شہرت میں اضافے کا باعث بنی۔ اب ایک نئی خبر سامنے آئی ہے، جس میں انکشاف کیا گیا ہے کہ وارنر نے اس فلم میں اپنی مختصر مگر اہم انٹری کے لیے خطیر معاوضہ وصول کیا۔
بھارتی میڈیا رپورٹس کے مطابق، کرکٹ سے فلمی دنیا میں قدم رکھنے والے ڈیوڈ وارنر کو “رابن ہڈ” میں اپنی پرفارمنس کے بدلے 3 کروڑ روپے ادا کیے گئے۔ مزید یہ کہ فلم کی شوٹنگ انہوں نے 2024 کے انڈین پریمیئر لیگ (آئی پی ایل) کے آخری سیزن کے دوران مکمل کی۔
یہ فلم 2024 میں بعض نامعلوم وجوہات کی بنا پر ریلیز نہیں ہو سکی تھی، تاہم بالآخر 28 مارچ 2025 کو بڑے پردے پر پیش کر دی گئی، جہاں یہ مداحوں کی جانب سے زبردست پذیرائی حاصل کر رہی ہے۔
