اسلام آباد(نیوز ڈیسک)ملک کے بیشتر علاقوں میں کل سے بارش کا امکان ظاہر کیا گیا ہے،
لیکن وفاقی دارالحکومت میں فضائی آلودگی کی صورتحال اب بھی تشویشناک ہے۔محکمہ موسمیات کے تازہ اعداد و شمار کے مطابق اسلام آباد میں موجودہ درجہ حرارت 19 ڈگری سینٹی گریڈ درج کیا گیا ہے، جبکہ ہوا کی رفتار 2 کلومیٹر فی گھنٹہ اور نمی کا تناسب 47 فیصد ہے۔ ماہرین کا کہنا ہے کہ آئندہ 24 گھنٹوں میں شہر میں 30 فیصد تک بارش ہونے کا امکان ہے، جس سے موسم میں نمایاں بہتری متوقع ہے۔محکمہ موسمیات نے مزید پیش گوئی کی ہے کہ فروری کے آخری ہفتے اور مارچ کے آغاز پر ملک کے شمالی و وسطی پہاڑی علاقوں میں بارشیں متوقع ہیں، جو سردیوں کی شدت کم کرنے میں مدد دیں گی۔دوسری جانب فضائی آلودگی میں اضافے کے باعث اسلام آباد کا مجموعی ایئر کوالٹی انڈیکس (AQI) 267 تک پہنچ گیا ہے، جس کے بعد شہر آلودہ ترین شہروں کی فہرست میں چوتھے نمبر پر آ گیا ہے۔
مختلف مقامات پر آلودگی کی صورتحال کچھ یوں رہی: اے کیو آئی کی شرح سی اے پی آر آفس میں 288، ماڈل ٹاؤن میں 257، ڈی ایچ اے فیز 5 میں 267، جب کہ سول سیکرٹریٹ میں آلودگی کی شرح 234 ریکارڈ کی گئی۔ طبی ماہرین نے عوام کو تاکید کی ہے کہ فضائی آلودگی کے بڑھتے ہوئے خطرے کے پیش نظر غیر ضروری طور پر گھروں سے باہر نہ نکلیں، خاص طور پر بچے، بزرگ شہری اور وہ لوگ جو سانس کی بیماریوں میں مبتلا ہیں۔ ماہرین کے مطابق آلودہ ہوا میں طویل وقت گزارنے سے سانس کی نالی اور آنکھوں کے مسائل کا خطرہ بڑھ سکتا ہے، اس لیے احتیاطی تدابیر اختیار کرنا ضروری ہے۔
