اسلام آباد (نیوز ڈ یسک) سعودی عرب نے متحدہ عرب امارات، بحرین، قطر، کویت اور اردن میں قائم امریکی تنصیبات پر ایران کی جانب سے کیے گئے
جوابی حملوں کی سخت الفاظ میں مذمت کی ہے اور اسے ان ممالک کی خودمختاری کے منافی اقدام قرار دیا ہے۔وزارتِ خارجہ کی طرف سے ہفتے کے روز جاری اعلامیے میں کہا گیا کہ ایران کی کارروائیاں برادر ممالک کی سالمیت کی کھلی خلاف ورزی ہیں۔ بیان میں اس امر پر زور دیا گیا کہ مملکت ان ممالک کے ساتھ مکمل یکجہتی رکھتی ہے اور کسی بھی ممکنہ صورتحال میں ان کی حمایت کے لیے ہر ممکن تعاون فراہم کرے گی۔سعودی حکام نے خبردار کیا کہ ریاستوں کی خودمختاری اور بین الاقوامی قوانین کی مسلسل پامالی کے سنگین نتائج برآمد ہو سکتے ہیں، اور ایسے اقدامات خطے کے امن و استحکام کو شدید نقصان پہنچا سکتے ہیں۔
اعلامیے میں عالمی برادری سے بھی مطالبہ کیا گیا کہ وہ ان حملوں کی واضح مذمت کرے اور خطے میں کشیدگی بڑھانے والی ایرانی سرگرمیوں کے خلاف مؤثر اور فیصلہ کن اقدامات اٹھائے تاکہ امن و امان کو لاحق خطرات کا سدباب کیا جا سکے۔
