اسلام آباد (نیوز ڈ یسک)متحدہ عرب امارات نے ایران کی جانب سے کیے گئے حملے کے بعد واضح کیا ہے کہ اسے اپنی سلامتی کے دفاع اور جواب دینے کا ’’مکمل اختیار‘‘ حاصل ہے۔
یو اے ای کی وزارتِ دفاع کے جاری کردہ بیان میں بتایا گیا کہ ملک پر ایرانی بیلسٹک میزائل فائر کیے گئے، تاہم فضائی دفاعی نظام نے متعدد میزائل فضا ہی میں تباہ کر دیے۔ حکام کے مطابق ابوظبی کے ایک رہائشی علاقے میں میزائلوں کا ملبہ گرنے سے مالی نقصان ہوا جبکہ ایشیائی نژاد ایک شخص جان کی بازی ہار گیا۔وزارت نے اس کارروائی کو سخت ترین الفاظ میں مسترد کرتے ہوئے کہا کہ شہری علاقوں، سرکاری تنصیبات اور قومی اداروں کو نشانہ بنانا ناقابل قبول ہے۔ بیان میں کہا گیا کہ اس قسم کے اقدامات خطے میں خطرناک کشیدگی کو جنم دیتے ہیں اور عام شہریوں کے امن کو خطرے میں ڈالتے ہیں۔
اماراتی حکام نے اسے قومی خودمختاری اور بین الاقوامی قوانین کی صریح خلاف ورزی قرار دیتے ہوئے کہا کہ ریاست اپنی سرزمین کے تحفظ اور ممکنہ خطرات کے تدارک کے لیے ہر ضروری قدم اٹھانے کا حق محفوظ رکھتی ہے، اور ملک کسی بھی صورتحال سے نمٹنے کے لیے پوری طرح تیار ہے۔دوسری جانب بحرین نے بھی اپنی حدود میں ہونے والے حملوں کی شدید مذمت کرتے ہوئے انہیں ’’غداری‘‘ قرار دیا ہے۔ بحرینی حکام کا کہنا ہے کہ ان حملوں میں ایسے مقامات کو نشانہ بنایا گیا جو مملکت کی خودمختاری اور سلامتی کے منافی ہیں۔
