اسلام آباد (نیوز ڈیسک) سعودی عرب میں مقیم پاکستانیوں کے لیے پاکستانی سفارتخانے نے ایک اہم مشاورتی اعلامیہ جاری کیا ہے۔
سفارتخانے کی جانب سے کہا گیا ہے کہ موجودہ حالات کے پیش نظر تمام پاکستانی شہری تحمل اور بردباری کا مظاہرہ کریں اور کسی بھی قسم کی غیر مصدقہ اطلاعات پر کان نہ دھریں۔ اعلامیے میں زور دیا گیا کہ معلومات کے حصول کے لیے صرف سعودی حکومت کے سرکاری اور مستند ذرائع پر اعتماد کیا جائے اور سوشل میڈیا پر گردش کرنے والی افواہوں کو نہ پھیلایا جائے اور نہ ہی ان کی بنیاد پر کوئی قدم اٹھایا جائے۔
مزید کہا گیا ہے کہ پاکستانی شہری صورتحال پر نظر رکھیں اور سعودی حکام کی جانب سے جاری ہونے والی ہدایات پر مکمل عمل درآمد یقینی بنائیں۔ جن افراد نے سفر کا پروگرام بنا رکھا ہے وہ ایئرپورٹ روانہ ہونے سے قبل اپنی پرواز کے اوقات اور موجودہ اسٹیٹس کی تصدیق متعلقہ ایئرلائن سے ضرور کر لیں۔
سفارتخانے نے واضح کیا ہے کہ اگر حالات میں کوئی نئی پیش رفت ہوئی تو اس بارے میں آگاہی سرکاری ذرائع کے ذریعے فراہم کی جائے گی۔
