لاہور(این این آئی)محکمہ داخلہ پنجاب نے لاہور میں دہشت گردی کے خطرے کے پیش نظر تھریٹ الرٹ جاری کردیا۔

محکمہ داخلہ کی جانب جاری الرٹ میں کہا گیا کہ فتن الخوارج کا کمانڈر تین خودکش بمباروں سمیت لاہور پہنچ گیا۔تھریٹ الرٹ میں کہا گیا کہ مصدقہ ذریعے سے معلوم ہوا ہے کہ فتن الخوارج کا کمانڈر آصف عمر نے 25فروری سے 3مارچ 2026کے دوران لاہور میں پولیس، قانون نافذ کرنے والے اداروں کی تنصیبات پر دہشت گردی کے حملوں کی منصوبہ بندی کی ہے۔محکمہ داخلہ نے آگاہ کیا کہ مذکورہ کمانڈر 3خودکش بمباروں کے ہمراہ وادی تیراہ کے راستے لاہور پہنچ چکا ہے، جنہیں افغانستان کے علاقے پکتیکا میں تربیت دی گئی ہے۔

مزید بتایا گیا کہ لاہور سے تعلق رکھنے والے 3سے 4مقامی سہولت کار اس تشکیل کی معاونت کر رہے ہیں اور یہ امر قابل ذکر ہے کہ مذکورہ عناصر نے اہداف کی ریکی مکمل کرلی ہے اور خودکش جیکٹس، اسلحہ، بارودری مواد اور ایک رکشہ بھی حاصل کرلیا ہے۔تھریٹ الرٹ میں کہا گیاکہ بارود سے بھری گاڑی VBIEDکے طور پر استعمال کیا جائے گا۔محکمہ داخلہ کے مطابق ہدایت کی جاتی ہے کہ دہشت گردی کے حوالے سے کسی بھی ناخوش گوار واقعے سے بچنے کیلئے فول پروف سیکیورٹی انتظامات اور چیکنگ کی اشد ضرورت ہے۔