دبئی (این این آئی)بھارتی کپتان روہت شرما نے آسٹریلیا کو شکست دے کر آئی سی سی چیمپئنز ٹرافی کے فائنل میں رسائی کے بعد اہم اعزاز حاصل کرلیا۔منگل کو دبئی میں ہونے والے چیمپئنز ٹرافی کے پہلے سیمی فائنل میں بھارت نے آسٹریلیا کو 4 وکٹوں سے شکست دے کر فائنل کے لیے کوالیفائی کرلیا۔

بھارت نے آسٹریلیا کا 265 رنز کا ہدف 49 ویں اوور میں 6 وکٹوں کے نقصان پر پورا کرکے فائنل کے لیے کوالیفائی کیا۔اس شاندار فتح کے بعد روہت شرما دنیا کے پہلے کپتان بن گئے جنہوں نے اپنی ٹیم کو چاروں بڑے آئی سی سی ٹورنامنٹس(ورلڈ ٹیسٹ چیمپئن شپ، ون ڈے ورلڈ کپ، ٹی ٹوئنٹی ورلڈکپ، چیمپئنز ٹرافی) کے فائنل میں پہنچایا۔ روہت شرما کی قیادت میں بھارت نے 2023 میں ورلڈ ٹیسٹ چیمپئن شپ کا فائنل اور پھر ون ڈے ورلڈ کپ کا فائنل کھیلا، دونوں میں اسے آسٹریلیا نے شکست دی۔ تاہم روہت کی کپتانی میں بھارت 2024 کے ٹی ٹوئنٹی ورلڈکپ کے فائنل میں پہنچا اور وہ پھر جنوبی افریقا کو شکست دے کر دوسری بار چیمپئن بنا۔اب روہت کی کپتانی میں بھارت چیمپئنز ٹرافی کے فائنل میں بھی پہنچ گیا ہے، دیکھنا یہ ہے کہ کیا روہت شرما کی قیادت میں بھارت چیمپئنز ٹرافی 2025 کا ٹائٹل بھی جیت پاتا ہے یا نہیں۔