نئی دہلی (این این آئی)بھارت میں مہا کمبھ میلے سے مشہور ہونے والے ابھے سنگھ جنہیں آئی آئی ٹی بابا کہا جاتا ہے انہیں تشدد کا نشانہ بنایا گیا ہے۔چیمپئنز ٹرافی 2025ء کے پانچویں میچ میں پاکستان اور بھارت کی ٹیمیں آمنے سامنے تھیں، جس کے حوالے سے بھارتی آئی آئی ٹی بابا نے دعویٰ کیا تھا کہ بھارتی کرکٹ ٹیم پاکستان کے خلاف میچ نہیں جیت سکتی۔
بھارتی میڈیا کی رپورٹس کے مطابق بھارتی آئی آئی ٹی بابا کو یکم مارچ کو نشر ہونے والے نجی چینل کے نیوز ڈیبیٹ پروگرام میں تشدد کا نشانہ بنایا گیا، جس کی شکایت انہوں نے بھارتی پولیس کو درج کروائی۔پولیس کے مطابق درج شکایت میں انہوںنے کہاکہ چند لوگوں نے نیوز روم میں داخل ہو کر مجھ پر حملہ کیا، مجھ سے بدتمیزی کی اور لاٹھیوں سے مارا پیٹا۔رپورٹس کے مطابق آئی آئی ٹی بابا کا مطالبہ ہے کہ پولیس ان کی مزید شکایت درج کرے تاہم ایسا نہ کرنے پر آئی آئی ٹی بابا نے احتجاج ریکارڈ کروایا۔میڈیا رپورٹس کے مطابق آئی آئی ٹی بابا اپنا احتجاج ریکارڈ کروانے کے لیے سیکٹر 126 کے علاقے میں پولیس چوکی کے باہر بیٹھ گئے۔بعد ازاں جب پولیس نے انہیں راضی کیا تو انہوں نے اپنا احتجاج ختم کر دیا۔
