لاہور(این این آئی)سابق کپتان محمد حفیظ نے شاہین، حارث اور نسیم سے پیچھا چھڑا کر آگے بڑھنے کا مطالبہ کردیا۔پاکستان کے سابق کپتان محمد حفیظ نے بھارت کے خلاف بدترین کارکردگی پر قومی ٹیم کے بولرز شاہین آفریدی، نسیم شاہ اور حارث رؤف کو تنقید کا نشانہ بنایا۔حالیہ انٹرویو میں مایوسی کا اظہار کرتے ہوئے انہوں نے کہا کہ تینوں فاسٹ بولرز نے 2023 کے ایشیا کپ کے بعد سے مسلسل ناقص کارکردگی کا مظاہرہ کیا ہے۔

محمد حفیظ نے کہا کہ شاہین شاہ آفریدی، نسیم شاہ اور حارث رؤف تینوں 2023 کے ایشیا کپ، 50 اوور کے ورلڈ کپ، ٹی ٹوئنٹی ورلڈ کپ اور اب چیمپئنز ٹرافی 2025 میں اچھی کارکردگی دکھانے میں ناکام رہے ہیں۔”انہوں نے کہا کہ یہ تسلیم کرنا ہوگا کہ انہوں نے خود کو ثابت نہیں کیا کہ وہ پاکستان کے لیے بڑے ٹورنامنٹ جیت سکتے تھے، اب آگے بڑھیں اور دوسرے بولرز جیسے محمد علی، خرم شہزاد، محمد وسیم جونیئر، عاکف جاوید اور میز حمزہ کو موقع دیں۔سابق کپتان نے کہا کہ یہ کھلاڑی اپنے مواقع کے منتظر ہیں وہ بھی پاکستانی ہیں اور ٹیم سے کھیلنے کے مستحق ہیں۔انہوں نے بابر اعظم پر تنقید کرتے ہوئے کہا کہ وہ دس سال سے پاکستان کے لیے کھیل رہے ہیں لیکن وہ بھارت کے خلاف ایک بھی فتح حاصل کرنے میں پاکستان کی مدد نہیں کرسکے۔واضح رہے کہ پاکستان ٹیم چیمپئنز ٹرافی میں اپنے دو میچز بھارت اور نیوزی لینڈ سے ہار چکی ہے اور آخری میچ پاکستان بنگلادیش سے کھیلے گا۔