اسلام آباد (نیوز ڈیسک) — ایران پر امریکی اور اسرائیلی کارروائیوں کے بعد امریکی صدر Donald Trump کا بیان بھی سامنے آ گیا ہے۔ انہوں نے اعلان کیا کہ امریکا نے ایران کے خلاف بڑے پیمانے پر فوجی آپریشن شروع کر دیا ہے اور اس کا مقصد ایران کی بحری اور میزائل صلاحیتوں کو ختم کرنا ہے۔

صدر ٹرمپ نے اپنے ویڈیو پیغام میں کہا کہ امریکی افواج ایران کے میزائل نظام اور اس کی میزائل انڈسٹری کو تباہ کرنے کے لیے کارروائی کر رہی ہیں۔ ان کا کہنا تھا کہ امریکا اس بات کو یقینی بنائے گا کہ خطے میں سرگرم ایران سے منسلک گروہ مزید بدامنی نہ پھیلا سکیں۔ انہوں نے دوٹوک انداز میں کہا کہ ایران کو کبھی بھی جوہری ہتھیار حاصل کرنے کی اجازت نہیں دی جائے گی۔

امریکی صدر کے مطابق ایران طویل فاصلے تک مار کرنے والے میزائل تیار کر رہا ہے جو امریکا اور دیگر ممالک کے لیے خطرہ بن سکتے ہیں، اسی لیے امریکی فوج وسیع پیمانے پر آپریشن میں مصروف ہے۔ انہوں نے خبردار کیا کہ کوئی بھی ملک امریکی مسلح افواج کی طاقت کو چیلنج نہ کرے۔ٹرمپ نے ایرانی نیشنل گارڈز اور دیگر حکام کو ہتھیار ڈالنے کی پیشکش کرتے ہوئے کہا کہ ایسا کرنے کی صورت میں انہیں مکمل استثنیٰ دیا جا سکتا ہے، بصورت دیگر نتائج سنگین ہوں گے۔ ایرانی عوام سے خطاب کرتے ہوئے انہوں نے کہا کہ اب ایک ایسا امریکی صدر موجود ہے جو ان کے لیے بہتر مستقبل کا راستہ فراہم کرنا چاہتا ہے۔