کراچی(این این آئی)کراچی کے نیشنل بینک کرکٹ ایرینا میں چیمپئینز ٹرافی کی تیاریاں مکمل کرلی گئی ہیں، وہیں کرکٹ ایرینا کی عمارت سے بھارتی جھنڈا نظر نہ آنے پر بھارتی میڈیا کو آگ لگ گئی۔رپورٹ کے مطابق بھارتی میڈیا نے اس بات کی نشاندہی کی نیشنل بینک ایرینا سے بھارتی پرچم غائب ہے جبکہ باقی ٹیموں کے جھنڈے لہرا رہے ہیں۔

اس حوالے سے ویڈیو ایک بھارتی صارف کی جانب سے ایکس اکائونٹ پر پوسٹ کی گئی جس نے بھارت میں ہنگامہ کھڑا کر دیا۔چیمپئینز ٹرافی کیلئے کراچی اسٹیڈیم نیوزی لینڈ، جنوبی افریقہ، افغانستان، پاکستان اور انگلینڈ کی ٹیموں کے میچز کی میزبانی کرنے والا ہے۔ ایونٹ کے آغاز سے چند روز قبل ایک ویڈیو منظر عام پر آئی جس میں ایونٹ میں حصہ لینے والے ممالک کے جھنڈے دیکھے جا سکتے ہیں جبکہ بھارتی جھنڈا کہیں نظر نہیں آیا۔بھارتی سوشل میڈیا صارفین نے کہاکہ انڈین ٹیم کے پاکستان نہ آنے پر انہوں نے ایسا کیا کیونکہ بھارتی ٹیم اپنے تمام میچز دبئی میں کھیلے گی۔

واضح رہے کہ چیمپئینز ٹرافی میں انڈیا کے میچز کیلئے نیوٹرل وینیو دبئی ہوگا، جہاں بھارتی ٹیم اپنے تمام میچز کھیلے گی جبکہ اسی مقام پر پاک بھارت ٹاکرا بھی 23 فروری کو کھیلا جائے گا۔چیمپئینز ٹرافی ایونٹ کا آغاز 19 فروری سے ہوگا، افتتاحی مقابلہ پاکستان اور نیوزی لینڈ کے درمیان کراچی میں کھیلا جائے گا۔