لاہور( این این آئی )قومی کرکٹ ٹیم کے کھلاڑی صائم ایوب کے ساتھ خاتون مداح کی بدتمیزی کی ویڈیو سوشل میڈیا پر وائرل ہو گئی۔صائم ایوب نے حال ہی میں لندن میں ایک فنڈ ریزینگ ایونٹ میں شرکت کی تھی۔نوجوان کرکٹر نے پاکستان سپر لیگ میں اپنی ایک میچ وننگ پرفارمنس کے بعد شائقین کرکٹ کے دل جیتے تھے۔وہ انڈر 19 کرکٹ میں بھی پاکستانی اسکواڈ کی نمائندگی کر چکے ہیں۔صائم ایوب پی ایس ایل اور پاکستان کی قومی کرکٹ ٹیم دونوں میں گرین شرٹس کی نمائندگی کر چکے ہیں۔نوجوان کھلاڑی ان دنوں علاج کی غرض سے لندن میں ہیں جہاں ٹخنے کی سرجری کے بعد اب ان کا ری ہیب جاری ہے۔

گزشتہ دنوں انہیں ایک فنڈ ریزنگ ایونٹ میں دیکھا گیا جہاں ہانیہ عامر بھی شریک تھیں۔ایونٹ کے بعد ایک خاتون مداح نے ان کے ساتھ تصویر کھنچوانے کی فرمائش کی تاہم اپنے دوستوں سے کہا کہ ویڈیو بنالو جس پر صائم ایوب آمادہ نہیں ہوئے اور وہاں سے جانے لگے۔ویڈیو میں دیکھا جا سکتا ہے کہ کھلاڑی کے وہاں سے جانے پر خاتون نے ان کے ساتھ بدکلامی شروع کردی۔خاتون نے انتہائی بدتمیزی سے کہا کہ اگر آپ دو منٹ بات کرلیں گے، تصویر کھنچوالیں گے تو کچھ نہیں ہوجائے گا۔

اس پورے دورانیہ میں صائم ایوب نے ایک لفظ بھی نہیں کہا جب کہ خاتون مسلسل انہیں باتیں سناتی رہیں۔بعدازاں کھلاڑی نے ان سے کہا کہ رک جاتا ہوں، تو مداح نے انہیں جانے کے لیے کہہ دیا۔مذکورہ ویڈیو وائرل ہونے کے بعد سوشل میڈیا صارفین نوجوان کھلاڑی کے حق میں سامنے آئے ہیں۔کوئی کہہ رہا ہے کہ صائم ایوب کی جگہ شعیب اختر کو ہونا چاہیے تھا۔ایک صارف نے کہا کہ جب ہماری خواتین ذرا سی مغربی طرز کی ڈریسنگ کرلیتی ہیں تو خود کو لیڈی ڈیانا سمجھنے لگتی ہیں۔ایک خاتون نے مداح پر تنقید کرتے ہوئے کہا کہ یہ چلا کیوں رہی ہے۔