دبئی (آئی این پی)پاکستان کے نوجوان بلے باز بابر اعظم لمیٹڈ اوورز کرکٹ کے انتہائی لاجواب بلے باز مانے جاتے ہیں تاہم انہوں نے اس سال ٹیسٹ کرکٹ میں بھی اپنا لوہا منوالیا اور دنیا کے نمبر ون بلے باز ویرات کوہلی سمیت تمام بلے بازوں کو پیچھے چھوڑ دیا۔
بابر اعظم نے خود کو سال 2018میں اوسط کے لحاظ سے ٹیسٹ کرکٹ کا کامیاب ترین بلے باز ثابت کر دیا ہے۔بابر اعظم نے جب اپنے ٹیسٹ کیریئر کا آغاز کیا تھا تو ان سے بہت زیادہ توقعات وابستہ تھیں مگر ابتدا میں وہ خود کو اپنی اہلیت کے مطابق ثابت کرنے میں ناکام رہے تھے۔لیکن کہتے ہیں وقت ہمیشہ ایک سا نہیں رہتا، 24سالہ بابر اعظم نے حال ہی میں کیویز کے خلاف دبئی میں کھیلے گئے ٹیسٹ میچ میں انہوں نے اپنی اولین ٹیسٹ سنچری اسکور کی۔ وہ اس سال 67.71کی اوسط سے 10اننگز میں 474ٹیسٹ رنز اسکور کر چکے ہیں۔اس فہرست میں دوسرا نمبر بھارتی کپتان اور دنیائے کرکٹ کے نمبر ون بلے باز ویرات کوہلی کا ہے جنہوں نے رواں برس 59.05کی اوسط سے 1063رنز اسکور کیے ہیں۔اس فہرست میں تیسرا نمبر سری لنکن اوپنر ڈیموتھ کرونارتنے کا ہے جنہوں نے 53.91کی اوسط سے 647رنز اسکور کر رکھے ہیں۔سابق جنوبی افریقی کپتان اے بی ڈویلیئرز نے رواں سال مئی میں ریٹائرمنٹ سے قبل 53.17کی اوسط سے 638رنز اسکور کر لئے تھے۔
