دبئی(آئی ا ین پی) پاکستان اور نیوزی لینڈ کے درمیان کھیلے گئے دوسرے ٹیسٹ میچ میں یاسر شاہ کیوی بلے بازوں پر قہر بن کر ٹوٹ گئے، انہوں نے میچ میں 14 وکٹیں حاصل کرکے کیویز کو اننگز کی شکست سے دوچار کیا۔تفصیلات کے مطابق دبئی اسپورٹس سٹی میں کھیلے گئے ٹیسٹ میچ کے تیسرے روز یاسر نے محض 41 رنز کے عوض 8 کھلاڑیوں کو پویلین کی راہ دکھائی۔
کیویز کو 90 رنز تک محدود کرکے فالو آن کا شکار کیا اور دوسری اننگز میں مزید 6 وکٹیں حاصل کرکے کیویز کو اننگز کی شکست کا مزہ چکھا دیا۔یاسر شاہ کی اس تباہ کن بولنگ پر سابق بھارتی کرکٹر بھی یاسر شاہ کی تعریف کئے بغیر نہ رہ سکے۔بھارت کے کامیاب بلے باز وی وی ایس لکشمن نے ٹویٹ کیا کہ دلچسپ ٹیسٹ کرکٹ جاری ہے ایک طرف سری لنکا کی آخری وکٹ نے انگلینڈ کا ڈٹ کر مقابلہ کیا اور دوسری جانب یاسر شاہ کے شاندار اسپیل کی بدولت نیوزی لینڈ محض 90 رنز پر آل آوٹ ہوگئی۔دوسری جانب ایک اور سابق بھارتی بلے باز محمد کیف نے بھی ٹویٹ کی، انہوں نے لکھا کہ یاسر شاہ کے عمدہ اسپیل کے آگے کیوی بلے بازوں کے پاس آوٹ ہونے کے علاوہ کوئی راستہ ہی نہیں تھا، یاسر شاہ ایک خاص لیگ اسپنر ہیں اور انھیں مزید بلندی پر بھی جانا ہے۔خیر اس بات میں کوئی دو رائے نہیں کہ یاسر شاہ کی تباہ کن بولنگ نے کیویز کے پیروں تلے زمین کھینچ لی مگر ہمیں اس جیت کے سحر میں کھونے کے بجائے اگلے میچ پر فوکس کرنا چاہیئے تاکہ سیریز جیت کر اپنی ٹیسٹ رینکنگ میں بہتری لائی جاسکے۔
