لاہور(آن لائن)پاکستان کرکٹ بورڈ کے سابق چیئرمین نجم سیٹھی نے پی سی بی کی جانب سے ان کے اخراجات سے متعلق تفصیلات کو اپنے خلاف مہم قرار دیدیا۔اتوار کو پاکستان کرکٹ بورڈ کے سابق چیئرمین نجم سیٹھی نے پی سی بی کی طرف سے جاری تفصیلات پر سماجی رابطے کی سائٹ ٹوئٹر پر اپنے رد عمل کا اظہار کیا۔انہوں نے کہا کہ میرے خلاف مہم پی سی بی میں نئی مافیا کی اختراع ہے۔
حقائق اور اعدادو شمار کو مسخ کرکے پیش کیا گیا ہے۔نجم سیٹھی کا کہنا تھا کہ مجھے بدنام کرنے کی مہم زیادہ دیر جاری نہیں رہ سکے گی۔واضح رہے کہ گزشتہ روز پاکستان کرکٹ بورڈ کی جانب سے سابق چیئرمین نجم سیٹھی کے 4سالہ دور کے اخراجات کی تفصیلات جاری کی گئی تھیں ،جس کے مطابق نجم سیٹھی پر پی سی بی کے 7 کروڑ سے زائد خرچ ہوئے۔
