لاہور(این این آئی)عالمی چمپئن باکسر عامر خان ایک ہفتے کے دورے پر (آج) اتوار لاہور پہنچیں گے ٗ داتا دربار پر حاضری بھی دیں گے۔ میڈیا رپورٹ کے مطابق پاکستانی نژاد برطانوی باکسر عامر خان ایک ہفتے کے دورے پر (آج) اتوار کو لاہور پہنچیں گے اور داتا دربار پر حاضری دیں گے، مزار پر چادر چڑھانے کے بعد آنے والے مقابلوں میں کامیابی کے لئے دعا مانگیں گے، سہ پہر کو واہگہ بارڈر پر پرچم اتارنے کی تقریب بھی دیکھنے جائیں گے۔لاہور میں دو تین دن قیام کے بعد باکسر عامر خان31 اکتوبر سے 2
نومبر تک اسلام آباد میں موجود ہوں گے جہاں وہ اپنی اکیڈمی میں نوجوان باکسرز کو کوچنگ ٹپس دیں گے۔ باکسر کے دورہ پاکستان کا مقصد پہلی عامر خان سپر باکسنگ لیگ کے انتظامات پر اسپورٹس بورڈ پنجاب، اسپانسرز اور دوسرے اسٹیک ہولڈرز کے ساتھ مشاورت کرنا ہے۔یہ باکسنگ لیگ ستمبر اکتوبر میں شیڈول تھی تاہم چند ناگزیر وجوہات کی بنا پر اسے ملتوی کردیا گیا تھا ٗ اب اس لیگ کو 2019 کے آغاز میں کرائے جانے کا امکان ہے۔ پاکستان میں قیام کے دوران باکسر کی مارکیٹنگ کی مصروفیات بھی ہیں۔
