کوالالمپور(مانیٹرنگ ڈیسک) باکسر محمد وسیم ملائیشیا میں ورلڈ فلائی ویٹ ٹائٹل کا مقابلہ بہت قریبی فرق سے ہار گئے، جنوبی افریقا کے موروتی متھالین کوفاتح قرار دے دیا گیا۔ تفصیلات کے مطابق کوالا لمپور میں ہونے والے ورلڈ فلائی ویٹ باکسنگ ٹائٹل کے مقابلے کے ابتدائی راؤنڈز میں موروتی متھالین اپنے حریف پاکستانی باکسر محمد وسیم پر حاوی رہے۔ فائٹ کے دوران دونوں باکسروں نے ایک دوسرے پر تابڑتوڑ حملے کئے ۔
فائٹ 12راؤنڈز پر مشتمل تھی ۔چھٹے راؤنڈ میں وسیم کے پنچز کے سامنے جنوبی افریقا کے باکسر کو مشکلات کا سامنا رہا لیکن موروتی متھالین نے اگلے راؤنڈ میں وسیم کا ڈٹ کر مقابلہ کیا اور فائٹ متفقہ فیصلے کے تحت جیت لی۔ تینوں ججوں نے 114، 113، 114 ، 113 اور 116 کے مقابلے میں 110 کے اسکور سے موروتی متھالین کو فاتح قرار دیا، محمد وسیم کو مسلسل 8 فتوحات کے بعد یہ پہلی شکست ہوئی ہے۔
