اسلام آباد (نیوز ڈ یسک)سعودی حکام نے خدشہ ظاہر کیا ہے کہ ایران سے وابستہ مسلح گروہ مملکت کی اہم تنصیبات کو نشانہ بنانے کی منصوبہ بندی کر سکتے ہیں،
جس کے پیش نظر ملک بھر میں سیکیورٹی اقدامات مزید سخت کر دیے گئے ہیں۔سرکاری ذرائع کے مطابق سیکیورٹی اداروں کو ہائی الرٹ کر دیا گیا ہے، جبکہ انٹیلی جنس رپورٹس میں اس بات کی نشاندہی کی گئی ہے کہ عراقی ملیشیاؤں اور یمن کے حوثی جنگجوؤں کی جانب سے، مبینہ طور پر پاسدارانِ انقلاب کی معاونت سے، حملے کیے جانے کا خدشہ موجود ہے۔
رپورٹس میں یہ بھی بتایا گیا ہے کہ ڈرونز اور میزائلوں کی ممکنہ نقل و حرکت پر گہری نظر رکھی جا رہی ہے تاکہ کسی بھی ممکنہ خطرے کا بروقت مقابلہ کیا جا سکے۔ حکام کے مطابق تیل و گیس کی تنصیبات، بندرگاہیں اور ہوائی اڈے حساس مقامات میں شامل ہیں، جن کی سیکیورٹی مزید مضبوط کر دی گئی ہے۔سعودی حکومت نے واضح کیا ہے کہ اگر مملکت کی سلامتی کے خلاف کسی بھی قسم کی کارروائی کی گئی تو اس کا مؤثر اور بھرپور جواب دیا جائے گا۔دوسری جانب سعودی حکام کا کہنا ہے کہ کشیدہ حالات کے باوجود ایران سمیت متعلقہ فریقوں کے ساتھ سفارتی رابطے برقرار ہیں اور مذاکراتی عمل بھی جاری ہے، جس سے صورتحال میں بہتری کی امید ظاہر کی جا رہی ہے۔
