اسلام آباد (نیوز ڈیسک) گھروں اور چھوٹے کاروباری مراکز میں سولر سسٹم لگانے کے خواہشمند صارفین کے لیے اہم سہولت متعارف کرادی گئی ہے۔

نیپرا نے 25 کلوواٹ تک کے سولر سسٹمز کی منظوری سے متعلق طریقہ کار میں تبدیلی کردی ہے۔نئے ضوابط کے تحت 25 کلوواٹ تک بجلی پیدا کرنے والے سولر سسٹم کی تنصیب کے لیے صارفین کو اب براہِ راست نیشنل الیکٹرک پاور ریگولیٹری اتھارٹی سے منظوری حاصل کرنے کی ضرورت نہیں ہوگی۔ترمیم شدہ طریقہ کار کے مطابق متعلقہ بجلی تقسیم کار کمپنیوں کو ایسے سولر سسٹمز کی منظوری دینے کا اختیار سونپ دیا گیا ہے، جس سے درخواستوں کی کارروائی پہلے کے مقابلے میں زیادہ آسان اور تیز ہونے کی توقع ہے۔

یہ تبدیلی سولر ریگولیشنز 2026 میں ترمیم کے بعد عمل میں آئی ہے۔ حکام کے مطابق اس اقدام کا بنیادی مقصد چھوٹے صارفین کے لیے سولر سسٹم کی تنصیب کے مراحل کو کم پیچیدہ بنانا اور منظوری کے عمل میں غیر ضروری تاخیر ختم کرنا ہے۔نئے نظام سے گھریلو صارفین کے علاوہ چھوٹے کاروبار کرنے والے افراد بھی مستفید ہوسکیں گے۔ توقع کی جا رہی ہے کہ اس سہولت کے نتیجے میں سولر سسٹمز کی منظوری کا عمل تیز ہوگا اور ملک میں شمسی توانائی کے استعمال کو مزید فروغ ملے گا۔