اسلام آباد (نیوز ڈیسک)محکمہ موسمیات نے ربیع الاول 1448 ہجری کے چاند کے حوالے سے ابتدائی فلکیاتی اندازہ جاری کر دیا ہے، جس کے مطابق 13 اگست کی شام چاند نظر آنے کے امکانات انتہائی کم ہیں۔
محکمہ موسمیات کا کہنا ہے کہ فلکیاتی حسابات، چاند کی عمر اور دیگر سائنسی عوامل کے پیش نظر 13 اگست کو رویتِ ہلال متوقع نہیں۔ اگر یہ پیش گوئی درست ثابت ہوئی تو یکم ربیع الاول 15 اگست بروز ہفتہ ہوگی، جبکہ 12 ربیع الاول 26 اگست بروز بدھ کو آنے کا امکان ہے۔ اسی تاریخ کو عید میلاد النبی ﷺ منائے جانے کی توقع بھی ظاہر کی جا رہی ہے۔
ادارے کے مطابق 13 اگست کی شام ملک کے بیشتر علاقوں میں جزوی طور پر ابر آلود موسم رہنے کی پیش گوئی ہے، جبکہ کراچی میں چاند شام 7 بج کر 40 منٹ پر غروب ہوگا، تاہم موجودہ فلکیاتی صورتحال کے باعث اس کی رویت کے امکانات کم دکھائی دیتے ہیں۔
محکمہ موسمیات نے واضح کیا ہے کہ یہ تمام معلومات صرف فلکیاتی اندازوں پر مبنی ہیں۔ ربیع الاول کے چاند کی حتمی رویت، اسلامی مہینے کے آغاز اور عید میلاد النبی ﷺ کی سرکاری تاریخ کا باضابطہ اعلان مرکزی رویت ہلال کمیٹی شہادتوں کی بنیاد پر کرے گی۔
