اسلام آباد (نیوز ڈیسک) پاکستان، سعودی عرب اور ترکیہ کے درمیان ہونے والے اہم دفاعی معاہدے پر بھارت نے بھی اپنا ردعمل ظاہر کر دیا ہے۔
بھارتی حکومت کا کہنا ہے کہ وہ تینوں ممالک کے درمیان ہونے والی اس پیش رفت کا بغور جائزہ لے رہی ہے۔بھارتی وزارت خارجہ کے ترجمان رندھیر جیسوال نے ہفتہ وار میڈیا بریفنگ کے دوران کہا کہ نئی دہلی کو پاکستان، سعودی عرب اور ترکیہ کے درمیان طے پانے والے مشترکہ دفاعی معاہدے سے متعلق پیش رفت کا علم ہے اور وہ اس معاملے پر مسلسل نظر رکھے ہوئے ہے۔ترجمان نے کہا کہ بھارتی حکام تینوں ممالک کے درمیان بڑھتے ہوئے دفاعی تعاون کا قریب سے مشاہدہ کر رہے ہیں۔ ان کے مطابق اس حوالے سے سامنے آنے والی مزید پیش رفت سے میڈیا کو مناسب وقت پر آگاہ کیا جاتا رہے گا۔
واضح رہے کہ پاکستان، سعودی عرب اور ترکیہ نے حال ہی میں ایک مشترکہ دفاعی معاہدے پر دستخط کیے ہیں۔ معاہدے کے تحت کسی ایک فریق کے خلاف ہونے والی جارحیت کو تینوں ممالک کے خلاف حملہ تصور کیا جائے گا۔تینوں ممالک کے درمیان ہونے والے اس معاہدے کو باہمی دفاعی تعاون اور مشترکہ سیکیورٹی کے حوالے سے ایک اہم پیش رفت قرار دیا جا رہا ہے۔
