کراچی (آئی این پی) نیشنل اسٹیڈیم کراچی میں پاکستان ویسٹ انڈیز کے درمیان پہلے ٹی ٹونٹی میچ سے قبل کھلاڑیوں کو سٹیڈیم لانے والی بلٹ پروف بس کی چابیاں گاڑی کے اندر ہی رہ گئیں، لاک ماسٹر کو منگوا کر گاڑی کا دروازہ کھولا گیا۔اتوار کو نیشنل سٹیڈیم کراچی میں کھیلے گئے میچ سے قبل اس وقت دلچسپ صورت حال پیدا ہوگئی جب ویسٹ انڈین کھلاڑیوں کو سٹیڈیم لانے والی بلٹ پروف کوچ کی چابیاں گاڑی کے اندر ہی رہ گئیں۔نیشنل سٹیڈیم کے مرکزی دروازے پر کھڑی گاڑی کو سائڈ پر ہٹانے کیلئے

لاک ماسٹر کو منگوایا گیا جس نے بلٹ پروف کوچ کے دروازے کا لاک کھولا جس کے بعد گاڑی کو وہاں سے ہٹایا گیا۔دریں اثناء وزیر اعلی پنجاب محمد شہباز شریف نے کہا ہے کہ ویسٹ انڈیز کرکٹ ٹیم کی پاکستان آمد کا خیر مقدم کرتے ہیں ۔ ویسٹ انڈیز کرکٹ ٹیم کی آمد سے پاکستان میں انٹرنیشنل کرکٹ کے دروازے کھلے ہیں اور امید ہے کہ دوسرے ممالک کی کرکٹ ٹیمیں بھی پاکستان آئیں گی۔انہوں نے کہا کہ لاہور اور کراچی میں پی ایس ایل میچوں کے کامیاب انعقاد سے پاکستان میں عالمی کرکٹ کی راہ ہموار ہوئی ہے۔پاکستان اور ویسٹ انڈیز کرکٹ کے دو بڑے نام ہیں ۔پاکستان اور ویسٹ انڈیز کے درمیان ہونے والی ٹی 20 کرکٹ سیریز دلچسپ ہوگی۔انہوں نے کہا کہ دونوں ٹیموں کے مابین ہونے والے شاندار مقابلوں سے شائقین کرکٹ محظوظ ہوں گے۔انہوں نے کہا کہ پاکستان کے عوام کرکٹ کے کھیل سے بے حد لگاؤ رکھتے ہیں اورپاکستانی پرامن قوم ہے اور کھیلوں کی سرگرمیوں میں گہری دلچسپی رکھتی ہے۔انہوں نے کہا کہ پی ایس ایل میچوں کے پرامن اور کامیاب انعقاد کے باعث شائقین کرکٹ کو شاندار کھیل دیکھنے کو ملا۔ویسٹ انڈیز کرکٹ ٹیم کی پاکستان آمد اس بات کا ثبوت ہے کہ پاکستان میں کرکٹ کے لئے حالات ساز گار ہیں۔انہوں نے کہا کہ کرکٹ کا کھیل پاکستان میں بہت مقبول ہے اورویسٹ انڈیز کرکٹ ٹیم کی پاکستان میں آمد کرکٹ کے کھیل سے لگاؤ رکھنے والوں کے لئے خوش کن خبر ہے۔