کراچی(یو این پی)پی ایس ایل کے دیوانوں کیلئے ایک اور خوشخبری، محکمہ موسمیات کا کہنا ہے کہ اتوار کی شام کراچی میں فائنل کے موقع پر بارش کی مداخلت کا ایک فیصد بھی امکان نہیں۔محکمہ موسمیات کے مطابق اتوار کے روز ملک کے بیشتر علاقوں میں موسم خشک رہے گا تاہم آج گلگت بلتستان میں چند مقامات پر تیزہواؤں اور گرج چمک کے ساتھ بارش کا امکان ہے۔ اتوار کی شام پی ایس ایل فائنل کے آغاز کے وقت بھی کراچی میں موسم صاف رہے گا
اور بارش کا بالکل بھی امکان نہیں۔ میچ کے دوران شہر کا درجہ حرارت 30 اور 31 سینیٹی گریڈ رہنے کا امکان ہے جبکہ ہوا میں نمی کا تناسب 26 فیصد ہوگا۔اگرچہ پاکستان بالخصوص کراچی میں رہنے والوں کیلئے تو یہ ایک خوشگوار شام ہوگی تاہم غیرملکی کھلاڑی تھوڑی گرمی محسوس کرسکتے ہیں۔ خوشی کی بات یہ ہے کہ میچ کے اختتام تک درجہ حرارت بتدریج کم ہو کر 27 اور 28 سینیٹی گریڈ تک آجائے گا تاہم ہوا میں نمی کا تناسب بڑھ کر 43 فیصد ہوجائے گا۔
