اسلام آباد(مانیٹرنگ ڈیسک)پاکستان کے صوبے خیبرپختونخواہ کے ضلع مردان کے علاقے کاٹلنگ میں ابھرتا ہوا نوجوان کھلاڑی زبیر احمد سر پر گیند لگنے سے جاں بحق ۔ تفصیلات کے مطابق مردان کے علاقے کاٹلنگ میں نوجوان کھلاڑی زبیر احمدسر پر کرکٹ کی گیند لگنے سے جاں بحق ہو گیا ہے ، جاں بحق ہونے والا کھلاڑی چیمپئنز ٹرافی فائنل کے ہیرو معروف پاکستانی
بلے باز فخر زمان کی کرکٹ اکیڈمی کا رکن تھا۔ واضح رہے کہ فخر زمان کا تعلق بھی کاٹلنگ سے ہے جبکہ پاکستان کے لیجنڈری بلے باز یونس خان بھی مردان سے تعلق رکھتے ہیں۔ پاکستان کرکٹ بورڈ نے مردان میں سر پر گیند لگنے سے نوجوان بلے باز کی ناگہانی موت پر افسوس اور تعزیت کا اظہار کیا ہے۔پی سی بی نے کرکٹر زبیر احمد کے اہل خانہ سے تعزیت کرتے ہوئے کہا کہ زبیر احمد کےانتقال سے ثابت ہوگیا کہ میچ کھیلتے ہوئے حفاظتی سامان اور ہیلمٹ پہننا کتنا ضروری ہے۔واضح رہے کہ زبیراحمد گزشتہ روز خیبرپختون خوا کے ضلع مردان کی تحصیل کاٹلنگ میں پریکٹس میچ کے دوران سر پر گیند لگنے سے جاں بحق ہوگئے تھے۔نجی کرکٹ اکیڈمی میں بیٹنگ کے دوران زبیر احمد کو تیز بال گردن پر لگی جس کے نتیجہ میں وہ شدید زخمی ہوگئے۔ انہیں بے ہوشی کی حالت میں طبی امداد کےلئے اسپتال منتقل کیا جارہا تھا کہ وہ راستے میں ہی دم توڑ گئے۔ زبیر احمد گیارہویں جماعت کے طالب علم تھے اورکرکٹ سیکھنے کےلئے گزشتہ کچھ عرصے سے اکیڈیمی سے منسلک ہوئے تھے۔زبیر احمد کی ناگہانی موت پر ان کے علاقے میں نہ صرف سوگ طاری ہے بلکہ ان کے ساتھ کھیلنے والے دیگر نوجوان کھلاڑی بھی شدید افسردہ ہیں۔ ان کے مطابق زبیر احمد نہ صرف ایک اچھا طالبعلم بلکہ بہترین کرکٹر بھی تھا اور اس میں یہ صلاحیت تھی کہ وہ جلد پاکستانی کرکٹ ٹیم میں ایک بہترین اضافے کے طور پر سامنے آتا۔
