کراچی(مانیٹرنگ ڈیسک) پاکستان ٹیم کے سابق کپتان اور بلے باز یونس خان کہتے ہیں کہ میچ کے دوران جب بیٹنگ اور فیلڈنگ میں مجھے مشکل آتی تھی تب میں زیادہ سے زیادہ استغفار کا ورد کرتا تھا۔نجی ٹی وی چینل کی رپورٹ کے مطابق یونس خان نے کہا کہ ویسے تو پورا قرآن ہی انسان کے لئے مشعل راہ ہے لیکن مشکل کے وقت استغفار کے ورد سے مجھے کافی مدد ملتی تھی۔شعیب جٹ کے ایک سوال کے جواب میں یونس خان نے کہا کہ کرکٹ میچز کے دوران جن دنوں میں
روزے نہیں رکھ سکا کوشش کروں گا کہ اب ان کی قضا پوری کرلوں۔ انہوں نے یہ بھی بتایا کہ ٹیم میں رہتے ہوئے اذان دینا کوئی انوکھا کام نہیں تھا کیونکہ یہ کام ہر مسلمان کرسکتا ہے۔ایک سوال پر یونس خان نے رمضان کے آخری عشرے میں اعتکاف کرنے کا بھی اظہار کیا۔ انہوں نے کہا ہمیشہ سے خواہش رہی کہ رمضان میں اعتکاف کروں لیکن میچز کے باعث ایسا نہ کرسکا۔ یونس خان نے کہا کہ رمضان میں غریب اور مستحق افراد کو افطار کروانا اجر کا کام ہے۔
