پاناما(مانیٹرنگ ڈیسک) پاکستان کے پروفیشنل باکسر محمد وسیم نے ایک اور کامیابی حاصل کرلی۔ محمد وسیم نے وسطی امریکی ملک پاناما کے باکسر کو دوسرے راؤنڈ میں ناک آؤٹ کر کے عالمی رینکنگ میں اپنی پہلی پوزیشن مستحکم کرلی۔تفصیلات کے مطابق صوبہ بلوچستان کے شہر کوئٹہ سے تعلق رکھنے والے پاکستانی باکسر محمد وسیم کا پاناما میں میزبان باکسر ایلیسر ویلڈیز سے ڈبلیو بی سی رینکنگ کے لیے مقابلہ ہوا۔فلائی ویٹ کیٹگری کے 8 راؤنڈز پر مشتمل مقابلے کے آغاز سے ہی محمد وسیم نے مخالف کھلاڑی پر بھر پور وار کیے

جس سے ان کے مقابل ایلیسر ویلڈیز دفاع کرنے میں مکمل طور پر ناکام رہے۔محمد وسیم کے مسلسل اور بھرپور حملوں سے مخالف باکسر دوسرے ہی راؤنڈ میں ناک آؤٹ ہوگیا۔نوجوان قومی باکسر محمد وسیم پروفیشنل مقابلوں میں اب تک ناقابل شکست ہیں اور یہ ان کی مسلسل چھٹی کامیابی ہے۔گزشتہ ماہ ورلڈ باکسنگ کونسل کی فلائی ویٹ کیٹیگری کی عالمی رینکنگ میں محمد وسیم کو پہلے نمبر پر رکھا گیا تھا۔اس مقابلے میں فتح کے بعد محمد وسیم کی ڈبلیو بی سی رینکنگ مزید مستحکم ہوگئی ہے۔