اسلام آباد(مانیٹرنگ ڈیسک)چیمپئنز ٹرافی فائنل کی فاتح پاکستانی ٹیم کے کپتان سرفراز احمد نے مقبولیت کے تمام ریکارڈ توڑ دئیے۔ سوشل میڈیا پر شہرت میں شاہ رخ خان کو بھی پچھاڑ دیا۔ تفصیلات کے مطابق چیمپئنز ٹرافی فائنل میں بھارت کو شکست دینے والی پاکستانی ٹیم

کے کپتان سرفراز احمد کے چرچوں نے سوشل میڈیا پر دھوم مچا رکھی ہے۔ پاکستانی کپتان نے مقبولیت کے تمام ریکارڈ توڑتے ہوئے بالی ووڈ کنگ شاہ رخ خان کو بھی شکست دیدی ہے۔چیمپئنز ٹرافی فائنل میں پاک بھارت ٹاکرے کو دنیا میں ڈیڑھ ارب سے زائد افراد نے دیکھا جو کہ خود ایک ریکارڈ ہے۔ پاک بھارت میچ دیکھنے والے سربراہان مملکت میں ترک صدر رجب طیب اردوان ، پاکستانی وزیراعظم نواز شریف، بھارتی وزیراعظم نریندرا مودی ، بنگلہ دیشی وزیراعظم حسینہ واجد شامل ہیں۔پاکستان اور مسلم ممالک میں ہر دلعزیز ترک صدر رجب طیب اردوان کی سوشل میڈیا پر وائرل ہونیوالی تصاویر میں دیکھا جا سکتا ہے کہ ترک صدر اپنے سٹاف کے ہمراہ پاک بھارت میچ سے لطف اندوز ہو رہے ہیں۔دوسری جانب بھارت میں چیمپئنز ٹرافی فائنل میں شکست پر سوگ کی فضا برقرار ہے اور کرکٹ ٹیم کے کھلاڑیوں کے گھروں اور اہلخانہ کی سکیورٹی میں اضافہ کر دیا گیا۔