لاہور (نیوز ڈیسک)پاکستان کرکٹ ٹیم کے لیگ سپنر یاسر شاہ کے ان فٹ ہونے کی خبریں گردش کررہی تھیں لیکن پاکستان کرکٹ بورڈ کی جانب سے آفیشل بیان سامنے آگیا کہ یاسر شاہ مکمل فٹ ہیں اور جمعہ سے انگلینڈ کے خلا ف اولڈ ٹریفورڈ ٹیسٹ کھیلیں گے۔یاسر شاہ کی انجری سے متعلق بعض اطلاعات سامنے آئیں تھیں کہ وہ پریکٹس کے دوران گیند لگنے سے زخمی ہوگئے ہیں جس کے باعث اولڈ ٹریفورڈ ٹیسٹ میں ان کی شرکت مشکوک ہوگئی ہے۔تاہم پاکستان کرکٹ بورڈکے ترجمان آغا اکبر اور پاکستان کرکٹ ٹیم کے منیجر انتخاب عالم کی جانب سے ایسی تمام خبروں کی تردید کردی گئی ہے۔پی سی بی کی جانب سے جاری کردہ بیان کے مطابق یاسر شاہ کو پریکٹس کے دوران گیند لگی تھی انہیں ٹیم فزیو شین ہائیز نیچیک کرنے کے بعد احتیاطاً اسکین کرنے کے لئے بھیجا تھا جس کے بعد رپورٹس کلیئر آئی ہیں۔ٹیم فزیو پر امید ہیں کہ یاسر شاہ کل سے شروع ہونے والے ٹیسٹ میچ کیلئے دستیاب ہونگے۔