اسلام آباد (آئی این پی ) پاکستان کرکٹ بورڈ(پی سی بی) کی سلیکشن کمیٹی کے سربراہ انضمام الحق اور بورڈ کے ڈائریکٹر عثمان واہلہ کے بعد نیشنل کرکٹ اکیڈمی کے ڈائریکٹر مدثر نذر بھی سرکاری خرچ پر لندن پہنچ گئے جبکہ دوسری جانب قومی کرکٹ ٹیم کے میڈیا منیجر آغا اکبر کے ماتھے پر لگنے والی مشکوک چوٹ نے کئی سوالات کو جنم دیدیا ۔ تفصیلات کے مطابق پاکستان کرکٹ بورڈ کے چیئرمین شہریار خان نے انٹرنیشنل کرکٹ کونسل کے حالیہ اجلاس میں کرکٹ کے انٹرنیشنل ایونٹس کی پاکستان میں میزبانی نہ ہونے پر ہونیوالے مالی نقصانات کے ازالہ کیلئے آئی سی سی کو پاکستان کی مالی مدد کرنے کا مطالبہ کیا ہے تو دوسری طرف پاکستان کرکٹ بورڈ نے اپنے اخراجات کم کرنے کی بجائے بورڈ کے آفیشلز کو سرکاری طور پر پاک انگلینڈ کرکٹ سیریز دیکھنے کیلئے برطانیہ کی یاترا کرنا شروع کر وا دی ہے ۔ ذرائع کے مطابق قومی کرکٹ ٹیم کے دورہ انگلینڈ کے دوران بورڈ آفیشلز کے دوروں کی لاٹری نکلی ہوئی ہے اور مرحلہ وار بورڈ کے حکام انگلینڈ کا دورہ کر رہے ہیں اور پاکستان کرکٹ بورڈ کی سلیکشن کمیٹی کے سربراہ انضمام الحق اور بورڈ کے ڈائریکٹر عثمان واہلہ کے بعد نیشنل کرکٹ اکیڈمی کے ڈائریکٹر مدثر نذر بھی سرکاری خرچ پر لندن پہنچ گئے ہیں جبکہ چیئرمین پاکستان کرکٹ بورڈ شہریار خان پہلے سے ہی لندن میں موجود ہے اور بورڈ نے انکے لئے لارڈر کرکٹ گراونڈ میں رائل باکس بھی مختص کئے رکھا ہوا ہے ۔ دوسری جانب قومی کرکٹ ٹیم کے ہمراہ میڈیا منیجر بن کر جانیوالے آغا اکبر کے ماتھے پر لگنے والی مشکوک چوٹ نے کئی سولات کو ابھارا ہے ، بعض اطراف سے یہ باتیں گردش کر رہی ہیں کہ ٹیم کے میڈیا منیجر آغا اکبر نشے میں تھے اور لوگوں نے ان کی پٹائی کی یا پھر وہ نشے کی حالات میں گر گئے تھے تاہم اس حوالے سے پی سی بی حکام سے موقف لینے کی کوشش کی گئی تو انہوں نے فون نہیں اٹھایا ۔