لندن (این این آئی) پاکستانی فاسٹ باؤلر وہاب ریاض نے انگلینڈ کے کھلاڑیوں کو خبردار کیا ہے کہ اگر کسی نے بھی آنے والی ٹیسٹ سیریز کے دوران پاکستانی کھلاڑیوں کے خلاف ناشائستہ زبان استعمال کی تو انھیں یہ بہت مہنگی پڑے گی۔جمعرات 14 جولائی سے پاکستان اور انگلینڈ کے درمیان لارڈز کے تاریخی گراؤنڈ میں 4 ٹیسٹ میچوں کی سیزیز کا پہلا میچ ہوگا 2010 میں محمد عامر، سابق کپتان سلمان بٹ اور محمد آصف لارڈز میں ہی اسپاٹ فکسنگ کرتے ہوئے رنگے ہاتھوں پکڑے گئے تھے جہاں تینوں کھلاڑیوں نے پیسوں کے عوض جان بوجھ کر نو بال کی تھی۔برطانوی عدالت نے اسپاٹ فکسنگ کے اعتراف پر تینوں کھلاڑیوں پر 5 سال کیلئے کرکٹ کی سرگرمیوں میں حصہ لینے پر پابندی عائد کرتے ہوئے جیل بھیج دیا تھا۔بعدازاں اس ٹور کے دوران جب دونوں ٹیمیں ایک روزہ انٹرنیشنل میچ کے دوران لارڈز کے ہی گراؤنڈ میں مد مقابل آئیں تو انگلینڈ کے بیٹسمین جوناتھن ٹروٹ اور وہاب ریاض کے درمیان تلخ جملوں کا تبادلہ ہوا تھا۔ غیرملکی میڈیا کے مطابق مذکورہ واقعہ کو یاد کرتے ہوئے وہاب ریاض نے کہاکہ وہ (جوناتھن) کچھ منہ پھٹ تھے اور جب بات منہ پھٹ ہونے کی ہو تو پاکستان کو کوئی مات نہیں دے سکتا، ہم سب سے زیادہ منہ پھٹ ہیں ٗہم بہت اچھے ہیں لیکن اگر کوئی ہم سے تلخی سے پیش آئے تو پھر ہم اسے معاف نہیں کرتے۔فاسٹ باؤلر کا کہنا تھاکہ وہ (جوناتھن) بہت تلخ ہوگئے تھے، وہ ناراض تھے کیونکہ رنز اسکور نہ کرنے کی وجہ سے وہ ون ڈے انٹرنیشنل سے باہر ہو رہے تھے، لیکن ٹیسٹ میں ان کی کارکردگی اچھی تھی۔وہاب ریاض کے مطابق یہ ان کی فرسٹریشن تھی جو انھوں نے مجھ پر نکالنے کی کوشش کی۔