لندن(مانیٹرنگ ڈیسک) پاکستان کرکٹ ٹیم کے لیگ اسپنر یاسر شاہ نے دورہ انگلینڈ میں اچھی کارکردگی کا عزم دکھاتے ہوئے آسٹریلیا کے سابق عظیم شین وارن سے مدد لینے کا ا ظہار کردیا۔یاسر شاہ انجری کے باعث دورہ انگلینڈ کیلئے قومی ٹیم کے کاکول میں منعقدہ فٹنس کیمپ سے باہر ہوگئے تھے ٗ ان کی بحالی کا عمل پی سی بی کی زیر نگرانی جاری تھا۔ایک انٹرویو میں انہوں نے کہاکہ میں شین وارن سے رابطے میں ہوں کیونکہ ان کا انگلینڈ میں ریکارڈ شاندار ہے اور ان سے ٹپس بھی لے رہا ہوں۔لیگ اسپنر نے کہاکہ میں نے ان کی انگلینڈ میں باؤلنگ کی ویڈیوز دیکھی ہیں اور بہت کچھ سیکھنے کو ملا ہے جیسا کہ مختلف زاویوں سے گیند کو سلو کرنے سمیت دیگر چیزیں سیکھی ہیںیاسر شاہ نے گزشتہ سال متحدہ عرب امارات میں شین وارن سے ٹپس لیں تھیں ٗشین وارن نے ان کی صلاحیتوں کو سراہا تھا۔ان سے دوبارہ ملاقات کی خواہش ظاہر کرتے ہوئے یاسر نے کہا کہ اگر متحدہ عرب امارات کی طرح میں ان سے دوبارہ مل سکا تو یہ شاندار ہوگا۔