اسلام آباد(مانیٹرنگ ڈیسک) دنیائے کرکٹ میں کروڑوں شائقین کے پسندیدہ معروف بھارتی بیٹسمین ویرات کوہلی نئی مشکل میں پھنس گئے‘ تفصیل کے مطابق معروف بھارتی بلے باز ویرات کوہلی نے انٹرنیٹ پر ایک تصویر جاری کی جس میں وہ کھانے کی ایک میز پر براجمان ہیں اور ان کے سامنے کئی اقسام کے عمدہ کھانے سجے ہوئے ہیں ‘ ویرات کوہلی کی ریسٹورنٹ میں لی جانے والی اس تصویر نے شائقین کو سخت رد عمل پر مجبور کر دیا۔ تصویر کے حوالے سے ایک صارف نے لکھا کہ کوہلی نے اس طرح غریبوں کا مذاق اڑایا ہے۔ ویرات کوہلی کے ایک چاہنے والے نے تبصرہ کرتے ہوئے کہا کہ ’[ڈیئر ویرات آپ سے درخواست ہے کہ آپ غریبوں کو کھانا کھلائیں ‘ آپ ایسی زندگی جی رہے ہیں جس کا آپ نے کبھی خواب میں بھی نہیں سوچا ہوگا‘ کچھ لوگوں کو ایک وقت کی روٹی بھی مشکل سے نصیب ہوتی ہے‘‘۔ جہاں بھارتی بلے باز کو تصویر کی وجہ سے سخت تنقید کا نشانہ بنایا جا رہا ہے وہیں کچھ لوگوں نے ویرات کی حمایت بھی کی ہے ‘ ویرات کے ایک شیدائی نے تبصرے میں لکھا کہ نفرت کرنے والے جو بولیں ، انہیں بولنے دو۔ واضح رہے کہ ویرات کوہلی کی متذکرہ بالا تصویر معروف بالی ووڈ اداکارہ انوشکا شرما نے بنائی تھی جو آج کل ویرات کے ساتھ ساتھ دکھائی دیتی ہیں اور دونوں میں خاصی دوستی چل رہی ہے۔